अछाम, चैत्र ८ - विश्वका बालबालिकाको स्थिति २०११ प्रतिवेदन दुर्गम गाउँ रामारोशनकी जवा खनालले गरेकी छन् । प्रतिवेदन गर्दै खनालले भनिन्, 'यस्तो प्रतिवेदन सार्वजनिक कार्यक्रमबारे मैले अहिलेसम्म न सुनेको थिएँ न त देखेकै थिएँ ।'
साधारणतया कम बोल्ने तेह्र वषर्ीया यी किशोरी अछामजस्तो पिछडिएको जिल्लामा विश्वका बालबालिकाको स्थिति सार्वजनिक गर्न पाउँदा निकै खुसी देखिन्थिन् ।
विकट गाविस रामारोशनबाट दुई दिन पैदल हिँडेर प्रतिवेदन सार्वजनिक गर्न उनी सदरमुकाम आएकी हुन् । गाउँका विद्यालयमा अतिरिक्त क्रियाकलापसमेत नहुने बताउँदै उनले दुर्गमका बालबालिकाको स्थिति दयनीय भएको दुखेसो त्यहाँ सुनाइन् ।
माओवादी सभासद शरद भण्डारीले अछामका करिब ४१ हजार बालबालिकामध्ये ७५ प्रतिशत शिक्षा, स्वास्थ्य, पोषणयुक्त खानाबाट वञ्चित रहेको बताए ।
बालबालिकाको स्थितिमा केही सुधार गर्न जिल्लास्तरीय राजनीतिक दलका प्रतिनिधिले उल्लेख्य योगदान पुर्याउन सक्ने उनको दाबी थियो । 'यहाँका मानिसको जनचेतनास्तर निकै कम छ, त्यसकारण अभिभावकलाई आफ्ना साना बालबालिकाप्रतिको कर्तव्य थाहा छैन,' उनले भने ।
एमाले सभासद भैरे कामीले दुर्गम गाउँका बालबालिकामा अभाव, पीडा, अशिक्षाबाहेक अरू केही नभएको बताए ।
सरकारले किशोरकिशोरीलाई सीपमूलक तालिम व्यवस्था गर्नुपर्ने भन्दै गरिबी, सामाजिक, आर्थिक असमानता र लैंगिक विभेदविरुद्धको संघर्षलाई अझ सशक्त बनाउनुपर्ने उनको भनाइ थियो । उनले असमानता किशोरावस्थामै सुरु हुने भन्दै विकट जिल्लामा गरिब र सीमान्तकृत वर्गका बालबालिकाले माध्यमिक तहमा पुग्ने सम्भावना कमै रहेको बताए ।
source:-ekantipur
Kantipur Fm 
