सुनसरी, १५ चैत ट्रक तोडफोड गरेको आरोपमा एक साताअघि पक्राउ परेका सिमरीया-२ का महेशकुमार चौधरीको रिहाई माग गर्दै प्रदर्शनमा उत्रिएका दुहवीस्थित सरस्वती माविका विद्यार्थी र प्रहरीबीच सोमबार झडप भएको छ ।
रिहाइको माग गर्दै स्थानीय सरस्वती माविका विद्यार्थीले इलाका प्रहरी कार्यालय दुहवीमा घेराउ गर्ने क्रममा प्रहरी र विद्यार्थीबीच झडप भएको हो । स्थानीय सरस्वती माविका विद्यार्थीले इलाका प्रहरी कार्यालय घेराउ गरेपछि प्रहरीले विद्यार्थीमाथि लाठीचार्ज गरेको थियो ।
प्रहरीको लाठीचार्जबाट १५ विद्यार्थी घाइते भएका छन् भने प्रहरीतर्फ एकजना घाइते भएका छन् । प्रहरीले सो झडपका क्रममा महेशकुमार चौधरीका बुबासहित दुईजना पक्राउ परेका छन् । प्रहरी कार्यालयमा झडपपछि आक्रोशित बनेका विद्यार्थीको समूहले आधा घन्टा दुहवी सडकखण्ड अवरुद्ध बनाएका थिए ।
विद्यार्थीले निर्दाेष चौधरीलाई पक्राउ गरेको भन्दै प्रहरी निरीक्षक नेत्र बरुबालविरुद्ध नाराबाजी गरेका थिए । ११ गते आदिवासी जनजाति मधेसी दलित गणतान्त्रिक मोर्चाको नेतृत्वलेे गरेको एकदिने बन्दका क्रममा को.१ख१६१७ नम्बरको ट्रकमा ढुंगामुढा गरेको आरोपमा प्रहरीले चौधरीलाई पक्राउ गरेको थियो । चौधरी दुहवीस्थित सरस्वती माविमा कक्षा ११ मा अध्यनरत छन् ।
चौधरीलाई प्रहरीले बेपत्ता बनाएको विद्यार्थी र आफन्तको भनाइ छ । यता,प्रहरीले भने आरोपको खण्डन गरेको छ । महेशलाई उनका आफन्तलाई भेट्न दिइरहेको इलाका प्रहरी कार्यालय दुहवीका प्रहरी निरीक्षक नेत्र बरुवालले बताए । चौधरीका आफन्तलाई पटक-पटक वार्तामा बोलाउँदा पनि नआएको उनको दाबी छ ।
source:-nayapatrika
Kantipur Fm 
0 commentaires