काठमाडौं, माघ १९ - चिकित्सकको लापरबाहीले एउटा आँखाको ज्योति गुमाएकी सिर्जना केसीले १२ वर्षपछि क्षतिपूर्ति पाएकी छन्।
सर्वोच्च अदालतका न्यायाधीश बलराम केसी र मोहनप्रकाश सिटौलाले २०६६ कात्तिक ९ गते नै पुनरावेदन अदालतको निर्णय सदर गर्दै विपक्षी ब्लुक्रस नर्सिङ होमले क्षतिपूर्तिबापत पीडितलाई ६ लाख १७ हजार दिलाउनुपर्ने फैसला गरेका थिए। नर्सिङ होमले मंगलबारमात्रै सिर्जनालाई क्षतिपूर्ति दिएको हो।
'अब मुद्दाको क्लेसमात्रै पनि बाँकी छैन भन्ने कुराले खुसी पारेको छ,' क्षतिपूर्ति लिएपछि मंगलबार साँझ सिर्जनाले भनिन्, 'ढिलै भए पनि न्याय पाएँ।' चिकित्सक दिनेशविक्रम शाहको लापरबाहीले १२ वर्षको उमेरमा उनले आँखाको ज्योति गुमाउनुपर्यो। छाती, कान, नाक र आँखामा त्यसको समस्या अझै छ। कालो टाटो अनुहारभरि फैलिँदै छ। छोरीलाई टाउको दुख्ने र आँखा बिझाउने भएपछि आमा सरिताले ब्लुक्रस नर्सिङ होममा लैजाँदा शाहले मलेरियाको औषधी टेग्रेटोल दिएका थिए। त्यही औषधीले सिर्जनामा समस्या देखिँदै गयो। अन्ततः २०५६ सालमा जिल्ला प्रशासन कार्यालयमा सरिताले उपभोक्ता संरक्षणअर्न्तगत शाहलाई विपक्षी बनाई क्षतिपूर्तिको माग गर्दै मुद्दा दायर गरिन्।
'पैसा ठूलो कुरा होइन,' सरिताले भनिन्, 'ढिलै भए पनि न्याय पायौं।'
source:-nagriknews
Kantipur Fm 
0 commentaires