९ फागुन, काठमाडौं । चुरेभावर राष्ट्रिय एकता पार्टीले जेठ १४ गतेभित्रमा नयाँ संविधान नबने नेताहरुलाई गाउँ-गाँउबाट लखेट्ने चेतावनी दिएको छ । थपिएको समयभित्र संविधान निर्माण गर्नुको साटो संविधानसभाको म्याद थप्ने षडयन्त्र भएको भन्दै उसले यस्तो चेतावनी दिएको हो ।
सोमबार राजधानीमा पत्रकार सम्मेलन गरी चुरेभावरले जेठ १४ गते संविधान जारी नभए १५ गतेबाट राजधानीमा आफ्ना २५ हजार शान्ति सेनालाई उतारेर आन्दोलन थाल्ने बताएको छ । संविधानसभाको म्याद पुन थप गरिए मुलुक गृहयूद्धमा जाने भन्दै चुरे भावरले जेठ १४ मा संविधान बन्न नसके तत्काल ताजा जनादेशमा जानु पर्ने माग पनि गरेको छ ।
पत्रकार सम्मेलनमा पार्टीका अध्यक्ष हिमालयन भक्त प्रधानाङ्गले पार्टीले कारवाही गरेका सभासद केशव मैनालीलाई सभामुख सुवास नेम्वाङ्गले नहटाएकोमा असन्तुष्टि जनाउनु भयो । तत्काल कारवाही नभए सिंहदरवार घेराउ गर्ने चेतावनी दिर्दै उहाँले भन्नुभयो-’अब हामि चुप लागेर बस्ने बाला छैनौं । यस्ता बेथितिको विरुद्ध प्रतिकारमा उत्रन्छौ ।’
पार्टीका वरिष्ठ उपाध्यक्ष एवम् शान्ति सेनाका कमाण्डर बाबु थापाले संविधान नबनाउने नेताहरुलाई जेठ १५ गतेपछि गाउँ-गाँउबाट लखेट्ने चेतावनी दिनुभयो ।
source:onlinekhbar









0 commentaires