फागुन, परासी । लोडसेडिङको समस्या बढ्दै गएपछि नवलपरासी जिल्लाको उद्योग व्यापारमा दैनिक रु एक करोड बढी नोक्सानी हुँदै गएको सरोकारवालाले बताएका छन् । लोडसेडिङका कारण उद्योग व्यापार प्रभावित हँुदा जिल्लामा ठूला साना गरी ८०० भन्दा बढी उद्योग कलकारखानालाई निकै असर पारेको छ । दैनिक उद्योग व्यापारमा रु एक करोडभन्दा बढी नोक्सानी यो क्षेत्रले बेहोर्दै आएको उद्योग वाणिज्य सङ्घका अध्यक्ष वैजनाथ जयसवालले बताउनुभयो ।
दैनिक १४ घन्टाको लोडसेडिङका कारण जिल्लामा निजी क्षेत्रका उद्योग व्यापार दिनप्रति दिन धरासायी बन्दै गएको छ भने यसको प्रत्यक्ष असर कामदारमा पनि परेको छ ।
उद्योग नचल्दा मजदुरहरूको दैनिक जीवनयापन पनि समस्याग्रस्त बन्दै गएको छ । नवलपरासीमा ७० हजारभन्दा बढी कामदार विभिन्न उद्योग कलकारखानामा काम गर्दै आएका छन् ।
यो समस्याबाट उत्पादन प्रभावित भई व्यापारमासमेत प्रतिकूल असर परेको सङ्घका कार्यकारी सचिव रामशङ्कर कुर्मीले बताउनुभयो ।
जिल्लामा ठूला ६, मझौला २३, साना २०० र घरेलु लघु उद्योग ६०० गरी ८०० भन्दा बढी उद्योग सञ्चालनमा रहेको सङ्घका महासचिव केशव भण्डारीले बताउनुभयो ।
निजी क्षेत्र बिना देशको आर्थिक विकास सम्भव नभएकाले सरकारले उद्योग कलकारखानाका लागि पर्याप्त मात्रामा विद्युत् आपूर्ति गर्न आवश्यक रहेको उद्योग वाणिज्य महासङ्घका केन्द्रीय सदस्य वीरेन्द्र अग्रहरीले बताउनुभयो । रासस
Kantipur Fm 
0 commentaires