कपिलवस्तु, फाल्गुन ८ - डोल्पाबाट घोडा चराउने गोठालाहरू तराई झरेका छन् । हिमाली क्षेत्र डोल्पामा अत्यधिक हिमपात हुने हुँदा गोठाला घोडा चराउन यता झरेका हुन् । हिमपातसँगै पर्ने हिउँले घोडाको आहार घाँसलाई मारेर उम्रन नदिने हुँदा आहारका लागि उनीहरू यता झर्ने गरेका छन् ।
अहिले ३ टोली डोल्पाली तराई झरेका छन् । जसमध्ये दुई टोली कपिलवस्तु सदरमुकाम तौलिहवा आसपास र एक टोली भैरहवामा छन् । कात्तिक अन्त्यतिर डोल्पाबाट हिँडेका घोडा यहाँ मंसिर पहिलो साता आइपुगेका हुन् । अहिले उनीहरू ३ ठाउँमा प्लास्टिकको पाल टाँगेर बसेका छन् । एक समूहमा रहेका ५० देखि ७० घोडा हेर्नका लागि ४ देखि ६ गोठाला लाग्ने गरेको डोल्पाबाट गोठाला गर्दै आएका प्रकाश बुढाले बताए । 'दिनभर घोडा चराउँछौं, साँझ परेपछि एकै ठाउँ बाँधेर राख्छौँ,' उनले भने । घोडासँगै उनीहरूले बन्दोबस्तीका सामान पनि लिएर आएका छन् ।
'पुसदेखि चैतसम्म डोल्पामा धेरै जाडो हुन्छ, घोडालाई घाँसपात गर्न पनि सकिँदैन, त्यसैले यता झरेको', गोठाला बुद्धि मगरले भने । घोडाको खास व्यापार भने यसबाट जन्मने खच्चड बिक्रीबाट हुने आम्दानी रहेको उनले बताए । तराईमा घोडा चराउन ल्याउँदा गधा लगाएर गर्भ राखी खच्चड जन्माउने गरिन्छ ।
खच्चड बिक्रीबाट नै राम्रो आम्दानी हुने भएकाले घोडा पालिएको गोठालाहरू बताउँछन् । घोडीबाट खच्चड जन्माउन उनीहरूले प्रत्येक समूहमा एउटा गधासमेत पालेका छन् । घोडाभन्दा दोब्बर बढी हिँड्न र बोक्न सक्ने हुँदा खच्चडको माग बढी हुन्छ । ३ वर्ष उमेर पुगेको खच्चड ८० देखि ९० हजारसम्ममा बिक्री हुन्छ । खच्चडले डोल्पामा सामान ओसारपसारको काम गरिरहेको हुँदा यसको माग बढी रहेको हो । डोल्पामा मालसामान र खाद्यान्न ढुवानी गर्ने एकमात्र साधन खच्चड भएकाले यसको बिक्रीका लागि साहूले ठूलो लगानी गरेर घोडा पाल्ने गरेको अर्का गोठाला आकाश बुढाले बताए ।
गोठाला काम गरेबापत उनीहरूले मासिक ३ हजारसहित खाना खर्च पाउने गरेको गोठाला बुद्धि बुढामगरले बताए । गोठाला सबैलाई साहूले नै मोबाइल पनि दिएका छन् । उनीहरूले खाली चौरमा सानो पाल बनाएर घोडासंँगै रात काट्ने गरेका छन् । नयाँ ठाउँ भएकाले चोर, डाँकाको डर पनि हुन्छ तर साँझ-बिहानको चुलोचौकोका लागि जोखिम उठाएर गोठालाको काम गरिरहेको उनले बताए ।
डोल्पाको सागरताराका उनीहरू रुकुम, बाग्लुङ, गुल्मी र रूपन्देही हुँदै एक महिनाभन्दा बढी लगाएर यहाँ आएको बताउँछन् । 'साहूलाई फाइदा हुन्छ होला र त, यत्रो लगानी गरेका छन्', पहिलोपटक मधेस आएका गोठाला आकाशले भने, 'घोडा चराउने काम त गाह्रो हँुदोरहेछ ।'
गोठालाहरूले यहाँबाट चैत २५ मा डोल्पाका लागि हिँड्ने तयारीमा रहेको बताए । कपिलवस्तु र रूपन्देहीका ३ टोली बुटवलको सिद्धबाबा आसपास भेट भई सँगै डोल्पाका लागि हिँड्ने उनीहरूले बताए ।
source:-kantipur
Kantipur Fm 
0 commentaires