काठमाडौ, माघ २० - संविधानसभाबाट संविधान निर्माण गरेका र संघीय लोकतान्त्रिक प्रणाली संस्थागत भएका मुलुकका अनुभव सँगालिएका पुस्तकहरू पक्कै पनि हाम्रा सभासदहरूले पढेको हुनुपर्छ भन्ने लाग्न सक्छ । तर संविधानसभा सचिवालयको पुस्तकालय रेकर्डले भन्छ- अधिकांश सभासदहरू पढ्दैनन् ।
संसदीय र लोकतान्त्रिक व्यवस्थाका ढाँचा र कतिपय मुलुकमा संविधानसभाबाट संविधान निर्माण भएका र हुन नसकेका अनुभव सँगालिएका साढे १२ हजारभन्दा बढी पुस्तक पुस्तकालयमा छन् । दिनमा सरदर दुईजना सभासद मात्र पुस्तकालयमा आएर अध्ययन गर्छन् ।
स्रोतका अनुसार नियमितजस्तो अध्ययन गर्न आउनेमा माओवादीका दीनानाथ शर्मा र हरि रोक्का छन् । उनीहरूबाहेक अरू एकाध सभासद मात्र अध्ययनका लागि आउने गर्छन्, त्यो पनि आक्कलझुक्कल ।
पुस्तकालयसँगै सभासदलाई वेबसाइटबाट हेर्ने र अध्ययन गर्ने सुविधासमेत छ । त्यहाँ पनि विरलैमात्र सभासद अध्ययन गर्न आउँछन् । वेबसाइट सुविधा प्रदान गरिएको कोठामा पाँचवटा कम्प्युटर छन् । त्यहाँ दिनको सरदर २/३ जना सभासद मात्र आउँछन् । 'पुस्तकालयमा महत्त्वपूर्ण पुस्तक प्रशस्त छन् । कतिपय सभासद समितिको बैठकका बेला मात्र पुस्तकालयमा जान्छन्, अरू बेला जाँदैनन्, सायद पढ्ने चाहनै नभएर होला,' कांग्रेस सभासद नवीन्द्रराज जोशीले कान्तिपुरसँग भने ।
सभासदहरू पढ्न नआउने उदेकलाग्दो स्थिति खेपिरहेका पुस्तकालयलाई त्योभन्दा बढी चिन्ता पुस्तकै नफर्काएकामा छ ।
सभासदले १५ दिनमा फर्काउने गरी दुईवटा पुस्तक लान पाउँछन् । तर कर्मचारीलाई दबाब दिएर वा सभामुख या संसद् सचिवालयका महासचिवको आडमा १५ वटासम्म लगेका छन् । र, धेरैले फर्काएका छैनन् । बढी पुस्तक लानेमा १५ भन्दा बढी सभासद छन् । आग्रह गर्दा फिर्ता गर्छु भन्ने तर कहिल्यै फिर्ता नगर्ने धेरै छन् ।
बढी पुस्तक लाने र समयमै फिर्ता नगर्नेमा राष्ट्रिय जनशक्ति पार्टीका प्रकाशचन्द्र लोहनी र माओवादीका हरि रोक्कालगायत छन् । टेलिफोनबाट ताकेता गर्दा जहिले पनि तत्काल फिर्ता गर्ने आश्वासन दिने तर नफर्काउने गरेको स्रोतले उल्लेख गरेको छ ।
पञ्चायतकालदेखि पुस्तक लगी फिर्ता नगर्नेमा पूर्वप्रधानमन्त्रीद्वय सूर्यबहादुर थापा र मरिचमान सिंह, राप्रपा अध्यक्ष पशुपतिशमशेर राणालगायत छन् । राणाले १३ वटा महत्त्वपूर्ण पुस्तक लगे पनि वर्षौंदेखि फर्काएका छैनन् । संसद् सचिवालयका पूर्वमहासचिव एवं रुसका राजदूत सूर्यकिरण गुरुङसमेत छन् । गुरुङले महासचिव हुँदा लगेका २० भन्दा बढी पुस्तक फिर्ता गरेका छैनन् । कर्मचारीले फर्काउन फोन सम्पर्क गर्दा बजारमा किन्न आग्रह गर्दै लागेको रकम आफूले तिर्ने बताउने गरेका छन् ।
source:-ekantipur
Kantipur Fm 
0 commentaires