भैरहवा/ लुम्बिनीमा निःशुल्क प्रसूति सेवा सञ्चालन हुने भएको छ। युनिभर्सल कलेज अफ मेडिकल साइन्सेज शिक्षण अस्पतालले लुम्बिनीमा अञ्चल तथा आसपासका क्षेत्रमा आमा सुरक्षा कार्यक्रम सञ्चालन गर्ने भएको हो।
मेडिकल साइन्सेज शिक्षण अस्पताल र जिल्ला जनस्वास्थ्य कार्यालय रुपन्देहीबीच सोमबार जनस्वाथ्य कार्यालय रुपन्देहीमा आमा सुरक्षा कार्यक्रम सञ्चालनका लागि सम्झौता भएको छ।
स्वास्थ्य तथा जनसंख्या मन्त्रालयले स्वीकृति प्रदान गरेअनुरूप अस्पताल भैरहवाका प्रमुख प्रशासकीय अधिकृत अजयकुमार पिएस र जिल्ला जनस्वास्थ्य कार्यालयका प्रमुख महेश्वरप्रसाद श्रेष्ठले सम्झौतापत्रमा हस्ताक्षर गरेका हुन् । सझौतापछि युनिभर्सल कलेज अफ मेडिकल साइन्सेज शिक्षण अस्पतालमा सम्पूर्ण प्रकारका प्रसूति सेवा जस्तै सामान्य प्रसूति सेवा, जटिलतायुक्त प्रसूति सेवा र शल्यक्रियाद्वारा गरिने प्रसूति सेवा पूर्णरूपमा निःशुल्क हुने भएको छ।
अस्पतालमा प्रसूति गराउने महिलाका लागि निःशुल्क दर्ता, निःशुल्क परीक्षण, प्रयोगशालालगायतका सेवा उपलब्ध हुने अस्पतालका सहायक प्रशासकीय अधिकृत नरेश ज्ञवालीले बताए।
source:-nayapatrika









0 commentaires