पोखरा, फाल्गुन ४ - लाइसेन्स वितरणमा सबैभन्दा धेरै अनियमितता हुने गरेको पोखरामा सीसीटीभी जडान हुने भएको छ । यातायात व्यवस्था विभागको एक टोली सीसीटिभीका उपकरण लिएर बुधबार यहाँ आइपुगेको छ ।
विभागका महानिर्देशक कृष्णप्रसाद दुवाडीको नेतृत्वमा प्राविधिक निर्देशक प्रेम सिंह र जडान गर्ने कम्पनीका प्राविधिक आएका हुन् । टोलीले
सोही दिन यातायात व्यवस्था कार्यालय परिसर निरीक्षण गरी क्यामेरा जडानका लागि ठाउँसमेत तय गरेको छ ।
राजधानीमा साउनमा सीसीटीभी जडान गरेपछि लाइसेन्स वितरणमा हुने अनियमितता निकै रोकिएको अनुभवले विभागले दोस्रो ठाउँमा पनि त्यस्तै क्यामेरा प्रणाली अपनाउन लागेको हो । अञ्चल यातायात व्यवस्था कार्यालय गण्डकीमा लाइसेन्सका लागि परीक्षा दिने सबैजसो उत्तीर्ण हुने गरेको समाचार छापिएकै भोलिपल्ट सीसीटीभी लिएर महानिर्देशक यहाँ आइपुगेका हुन् ।
'पत्रिकामा समाचार छापिएपछि, यो त भएन भन्दै कर्मचारीको तर्फबाट अनियमितता रोक्ने प्रयासस्वरूप सबै सामान जुटाइ लिएर आयौं', उनले कान्तिपुरसँग भने, 'क्यामेराले मात्रै सबै अनियमितता बन्द गरेर कायापलट नै त नहोला तर राज्यको कर्मचारीका तर्फबाट प्रयास गर्न लागेका हौं । सेवाग्राही, कर्मचारी, नागरिक समाज सबैको सहयोग भएमा मात्र अनियमितता रोकिएला ।'
टोलीले बुधबारदेखि नै क्यामेरा जडान कार्य थाल्ने भएको छ । लाइसेन्सको प्रयोगात्मक परीक्षालाई पारदर्शी बनाउन दुई क्यामेरा, मनिटर, ब्याट्री लगायतका विद्युतीय उपकरण जडान गरिने पोखरा कार्यालयका निमित्त प्रमुख कालिबहादुर भुजेलले बताए ।
यो सबै काम एम टेक कम्पनीले गर्न लागेको छ ।
काठमाडौंमा पनि सोही कम्पनीले जडान गरेको थियो । काठमाडौंको पुल्चोकस्थित साझा भवन र सिंहदरबारको बग्गीखानामा सीसीटिभी जडान भएको थियो । एक ठाउँमा यो प्रविधि जडान गर्न ३ देखि साँढे ३ लाख रुपैयाँ खर्च हुने कामु महानिर्देशक दुवाडीले बताए । इन्टरनेटको लिज लाइन लिएपछि विभाग, मन्त्रालयबाट समेत पोखराको प्रयोगात्मक परीक्षा तत्कालै वा रेकर्डमा चाहेको बेला हेर्न सकिने उनले बताए ।
राजधानीमा सीसीटिभी जडान गरेपछि यहाँ लाइसेन्समा चाप बढेको थियो । ड्राइभिङ स्कुललाई पैसा दिएर वा सामान्य भनसुनबाट समेत हाजिर भएपछि ट्रायल नकटाए पनि सजिलै लाइसेन्स पाइने गरेको थियो । ड्राइभिङ इन्स्िटच्युटमार्फत यातायात कर्मचारीले रकम लिने भएपछि यहाँ राजनीतिक दल, भ्रातृ संस्थाका नेता, कर्मचारी वा प्रहरीका आफन्त, पत्रकार समेतको भनसुनका भरमा सजिलै लाइसेन्स पाउँदै आएका थिए ।
source:-kantipur
Kantipur Fm 
0 commentaires