अमन कोइराला सर्लाही, माघ २० - पश्चिम दक्षिणस्थित बलरा गाविससँग जोडिएको बसभिटामा भारतले दसगजा मिचेर अग्लो बाटो निर्माण गरेको छ ।अन्तर्राष्ट्रिय सीमा मिचेर उचाइको बाटो बनाउन थालेपछि स्थानीय प्रशासनले स्थलगत निरीक्षण गरी काम रोक्न आग्रह गरेको हो । केही दिनअघिदेखि दसगजामा जोडिएको भारतको बसभिटा ग्राम पञ्चायतअन्तर्गत रघुनाथपुर छेउको माटो हालेर अग्लो बाटो बनाउन थालिएको थियो ।
'अन्तर्राष्ट्रिय सीमा मिचेर बाटो बनेको हामीले सूचना पाएपछि त्यहीं पुगेर रोक्न भनेका छौं,' प्रमुख जिल्ला अधिकारी शम्भु घिमिरेले भने, 'काम रोकेर तत्काल माटो हटाउन त्यहाँका बासिन्दा र सीमा सुरक्षा बललाई निर्देशन दिएको छ ।'
सुरक्षा निकायका पदाधिकारी सोमबार निरीक्षणका लागि त्यहाँ पुगेका थिए । दसगजा सीमा छुट्याउने ३३९/१३ देखि ३३९/२५ सम्मका १३ वटा पिलर नजिकै बाटो बनाएको प्रजिअ घिमिरेले जनाए । बाटो बनाएको क्षेत्रमा पर्ने ३३९/१४ नम्बरको पिलर भने ढलेको उनले बताए ।
दसगजाको ९ मिटर जमिन मिचेर करिब ८ सय मिटर लम्बाइ र चार फिट अग्लो बाटो बनिसकेको अवस्थामा छ । बलरा गाविस १ लक्ष्मीपुर टोलको दक्षिणमा दसगजासँगै टाँसिएर बनेको बस्तीका बासिन्दाको प्रयोगका लागि उक्त बाटो बनाएको हो ।
सीमास्तम्भबाट दुवैतिर १० मिटर जमिन छाड्नुपर्नेमा भारतपट्ट बस्ती बिस्तार र बाटो निर्माण गर्दा एक मिटर पनि खाली छैन । उक्त ठाउँमा नेपालपट्टि भने ५० मिटर खाली छ ।
बाटो निर्माण नगर्न र थुपारिएको माटो हटाउन सीमावर्ती भारतको सितामढी जिल्लाका डिस्टि्रक मजिस्टे्रटलाई खबर गर्न खोजिए पनि सम्पर्क हुन नसकेको जिल्ला प्रशासनले जनाएको छ । 'हामीले तत्कालै गृह मन्त्रालयलाई जानकारी गराइसकेका छौं,' घिमिरेले भने, 'दसगजा मिचेर कुनै हालतमा त्यसरी बाटो बनाउन मिल्दैन ।'
रघुनाथपुरका बासिन्दा र सीमा सुरक्षा बल (एसएसबी) का स्थानीय कमान्डरलाई बाटो रोक्न स्थानीय प्रशासनले मौखिक आग्रहपछि काम रोकिएको सुरक्षा अधिकारीले बताए । औपचारिक रूपमा काम रोकिएको छ छैन भन्ने जानकारी नभएको प्रजिअ घिमिरेले बताए ।
source:-ekantipur
Kantipur Fm 
0 commentaires