१५ माघ, कन्चनपुर । कन्चनपुरको ग्रामिण क्षेत्रका ९० प्रतिशतभन्दा बढी महिला यौनरोगबाट पीडित भएका पाइएको छ । यौनाङ्गको नियमित सरसफाइमा कमी र असुरक्षित यौनसम्पर्कका कारण उनीहरू प्रभावित भएका उपचारमा संलग्न चिकित्सकहरूले बताएका छन् ।
निर्धनवर्गका महिलाको प्रजनन स्वास्थ्यमा सुधार ल्याउने उद्देश्यले संयुक्त राष्ट्रसङ्घीय निकाय युनिसेफ र यूएनएफपीएको सहयोगमा यहाँका त्रिभुवनबस्ती र पिपलाडी स्वास्थ्य चौकीमा सञ्चालित निःशुल्क प्रजनन स्वास्थ्य शिविरमा उपचारका लागि पुगेका अधिकांश महिला यौनरोगबाट पीडित भएका शिविरका संयोजक जीवन घिमिरेले बताउनुभयो ।
शिविरमा उपचारका लागि आएका अधिकांश महिलामा योनीबाट सेता पानी बग्ने, तल्लो पेट दुख्ने, महिनावारीमा गडबडी हुने, यौनाङ्ग चिलाउने र जटिल प्रकृतिका यौनरोग देखापरेको उहाँले जानकारी दिनुभयो । संयोजक घिमिरेका अनुसार त्रिभुवनबस्तीमा नौ सय ४६ महिलाको र पिपलाडीमा एक हजार २१ जना महिलाको स्वास्थ्य परीक्षण गरिएको छ ।
स्वास्थ्य परीक्षण गरिएकामध्ये त्रिभुवनबस्तीका २३ र पिपलाडीका २२ जना पाठेघर खसेका महिलाहरूलाई निःशुल्क शल्यक्रियाका लागि यातायात खर्च, खाना खर्चसहित बिरामी र कुरुवालाई बाँकेको कोहलपुरस्थित मेडिकल कलेजमा पठाइने व्यवस्था मिलाइएको कार्यक्रम संयोजक घिमिरेले बताउनुभयो ।
यौनरोगसम्बन्धी समस्या भएका महिलाहरूलाई यौनाङ्गको सरसफाइ र रोग निदान गर्न निःशुल्क औषधि र परामर्श प्रदान गरिएको बताइएको छ ।
उक्त शिविर सुदूरपश्चिमका अछाम र कञ्चनपुरमा सम्पन्न भएका छन् भने बाजुरामा एक हप्तापछि सुरु हुनेछ । यसैगरी पूर्वाञ्चलको सिरहा, सप्तरी, महोत्तरी र मध्यमाञ्चलको धनुषामा समेत सञ्चालन गरिने छ । देशभरिका सातवटा जिल्लामा दुईवटाका दरले शिविर सञ्चालन गरिनेछ । रासस
Kantipur Fm 
0 commentaires