जनकपुरमा विवाह पञ्चमी मेलाको तयारी, मेलामा हात्ती, घोडा र उँटले शोभा बढाउने

Share

प्रत्येक जनकपुरमा विवाह पञ्चमी महोत्सवको उपलक्ष्यमा लाग्ने मेलाको तयारी सुरु भएको छ । यसपटक सीताराम विवाह पञ्चमी महोत्सवमा हात्ती, घोडा र उँटले पनि शोभा बढाउने भएको छ । विगतमा झैं यस वर्षपनि साता व्यापी रुपमा विवाह पञ्चमी महोत्सव मनाइने र यसपटक महोत्सवमा हात्ती, घोडा र उँटको प्रयोग गर्ने निर्णय गरिएको बताइएको छ । जानकी मन्दिर स्थित शीशमहलमा भएको सर्व पक्षीय बैठकले हात्ती, घोडा र उँटको व्यवस्था गर्न महावीर युवा कमिटीलाई आग्रह गरेको छ । सो कमिटीले २०० वटा हात्ती, घोडा र उँटको व्यवस्था गर्ने कमिटीका अध्यक्ष शम्भुप्रसाद साहले बताए ।
यही मंसिर १९ गतेदेखि २५ गतेसम्म विवाह पञ्चमी मनाइने कार्यक्रम रहेको छ । कार्यक्रम अन्तर्गत मंसीर १९ गते नगर दर्शन, २० गते फूलबारी तीला र २१ धनुषा यज्ञ जानकी परिसरमा हुने र मंसिर २२ गते तिलकोत्सव राममन्दिरमा, २३ गते मटकोर अङ्गराज पोखरीमा र २४ गते वैवाहिक कार्यक्रम रहेको छ ।
सो अवसरमा साँस्कृतिक झाँकी प्रदर्शन गरिने कार्यक्रम समेत रहेको बताइएको छ । मंसिर २५ गते राम कलेवाको आयोजना गरी विवाह महोत्सवको समापन हुने कार्यक्रम निर्धारण गरिएको छ ।
बैठकले विवाह पञ्चमी महोत्सव अवधिमा लोडसेडिङ नगर्न भनि विद्युत प्राधिकरणलाई अनुरोध समेत गरेको छ ।

source:-dainikee