काठमाडौ, मंसिर ३ - नक्कली शैक्षिक प्रमाणपत्र पेस गरेर विदेशमा अध्ययनका लागि जाने तयारीमा हुनुहुन्छ भने सावधान । अधिकांश दूतावासले शंका लागेका शैक्षिक प्रमाणपत्रबारे गोप्य रूपमा अनुसन्धान थालेका छन् ।
बिहीबार मात्रै प्रहरीको विशेष टोलीले जर्मनी दूतावासमा नक्कली प्रमाणपत्र बुझाएर भिसाका लागि प्रयास गरेका एक आवेदकलाई पक्राउ गर्यो । ती आवेदकको सूचना आधारमा नक्कली प्रमाणपत्र बनाउने गिरोहमा संलग्न एक सञ्चारकर्मीसहित अन्य ६ जना पक्राउ परे ।
जर्मनी दूतावासमा नक्कली प्रमाणपत्र पेस गर्ने आवेदक हुन् कृष्णबहादुर थापा । उनको एसएलसी र प्लस टुका शैक्षिक प्रमाणपत्र 'अस्वाभाविक' देखेपछि दूतावासले गोप्य
रूपमा उनका कागजात यकिन गर्न प्रहरीलाई अनुरोध गरेको थियो । प्रहरीले सम्बन्धित निकायमा कागजपत्र जाँच गर्दा सबै नक्कली भएको रहस्य खुल्यो । त्यसपछि तत्कालै थापालाई नियन्त्रणमा लिइयो ।
थापाले उक्त प्रमाणपत्र आफन्तमार्फत ३६ हजार रुपैयाँमा किनेका रहेछन् । अनुसन्धानमा संलग्न एक अधिकृतका अनुसार रेसम केसीले २८ हजारमा उक्त प्रमाणपत्र बनाउन लगाई थापालाई बेचेको खुल्न आयो । २८ हजार लिने केसीले दीपक राउत नाम गरेका अर्का एक व्यक्तिलाई १७ हजार दिएर लिएका रहेछन् । राउत पत्रकार महासंघ काभे्र शाखाका सञ्चारकर्मी समेत हुन् ।
राउतको बयानअनुसार उनले पनि प्रकाश लामा भन्ने व्यक्तिलाइ १५ हजार तिरेर लिएका रहेछन् । लामाले पनि राजेन्द्र श्रेष्ठ भन्ने व्यक्तिलाई दस हजार पाँच सय रुपैयाँ दिएर बनाउन लगाएको खुल्यो । एक पछि अर्को गर्दै पक्राउ परेका अभियुक्तका बयानअनुसार श्रेष्ठले पनि आशा लामा नाम गरेका अर्का एक कम्प्युटर व्यवसायीलाई तीन हजार दिएर प्रमाणपत्र बनाएका रहेछन् ।
लामाले ललितपुरको टंगालस्थित रियल भिजन कम्प्युटर इन्स्िटच्युटबाट ती नक्कली प्रमाणपत्र बनाउने गरेको भेटियो । प्रहरीले उक्त इन्स्िटच्युटबाट थप अनुसन्धानका लागि चार थान कम्प्युटरसमेत नियन्त्रणमा लिएको छ ।
पक्राउ परेका सबै काभ्रे जिल्ला निवासी हुन् । प्रहरीले नक्कली प्रमाणपत्र बनाउन संलग्न सबैलाई पक्राउ गरी थप अनुसन्धानका लागि बिहीबारै महानगरीय अपराध महाशाखामा बुझाएको छ ।
source:-ekantipur
Kantipur Fm 
0 commentaires