सर्लाही , मंसिर ८ -ठूलो पर्दामा जुनसुकै हिसाबले योगदान दिन चाहने दर्जनौं युवायुवतीको उत्साहलाई नेपाली फिल्मका 'कान्छा निर्देशक' श्याम भट्टराईले निराश पारेनन् ।
'१३ वर्षअघि कला क्षेत्रमा आफन्त नभएको मैले काठमाडौं गएर कठिन संघर्ष गरेँ,' सञ्चार संगमद्वारा हरिऔनमा सञ्चालित आधारभूत चलचित्र कलाकार तालिमको समापनमा मंगलबार उनले भने, 'अहिले तपाईंहरूलाई सहयोग गर्न सक्ने अवस्थामा छु, यहाँबाट उत्पादन भएका सक्षम कलाकारलाई सहयोग गर्छु ।'
सर्लाहीबाटै उदाएका निखिल उप्रेती, जल शाह, सारंगा श्रेष्ठ, विक्रान्त बस्नेत, नारद खतिवडा, नागेन्द्र रिजालजस्ता कलाकारको उदाहरण दिँदै निर्देशक भट्टराईले भने, 'दसैंमा घर आउँदा बारम्बार सम्मान पाएपछि आफ्नो गाउँठाउँलाई केही दिन सकिन्छ कि भनेर यो तालिम सञ्चालन गरेको हुँ ।' सातदिने तालिममा भट्टराई स्वयंले प्रशिक्षण दिएका थिए । उनले गृहजिल्लामा मात्रै एउटा पूरै फिल्म छायांकन गर्ने योजना पनि सुनाए ।
निर्माता छवि ओझाले आफ्ना आउँदा फिल्ममा कम्तीमा दुई प्रशिक्षार्थीलाई खेलाउने प्रतिबद्धता जनाए । कार्यक्रममा सर्लाही घर भएका नवनायक मुकेश आचार्य पनि थिए ।
source:ekantipur









0 commentaires