म्याग्दी, कात्तिक ३०- म्याग्दीका एक सुन व्यवसायीले २५ सय पर्ने सुनका लागि एक बालकको अपहरणपछि ज्युँदै खोलामा फालेर हत्या गरेका छन्। कुहुँ- ४ का लोकबहादुर फगामी र टकदेवीका ६ बर्षीय छोरा निकेशलाई तातोपानीका सुनचाँदीका गहना व्यवसाय गर्ने सुवास विश्वकर्माले शनिबार जिउँदै म्याग्दी खोलामा फालेको सकारे। मामाघर बसी तातोपानी इङ्लिस बोर्डिङ स्कुलमा नर्सरी अध्ययनरत बालक निकेशले लगाएको सुन खोसेको सार्वजनिक हुने डरले हत्या गरेको विकलाई उद्धृत गर्दै डिएसपी दिनेशकुमार आचार्यले जानकारी दिए। विकले बालकलाई चक्लेट दिने प्रलोभनमा पसलमा बोलाई सोही दिन खोलामा फालेको बयान दिएका छन्। 'फकाएर सुन झिकेपछि पोल खुल्ने डरले हत्या गरेको विकले बयान दिए,' आचार्यले भने, 'मुन्द्रा किचेर पातलो बनाई बेनी बजारको एक सुन पसलमा २५ सय ५ पाँच रुपैयाँमा बेचेको समेत अनुसन्धानमा देखिएको छ।' निकेशले दुवै कानमा ६ रती सुनका मुन्द्रा लगाएको भए पनि केही दिनअघि एक कानमा सानो घाउ आएकाले आमा टकदेवीले त्यहाँको मुन्द्रा झिकिदिएको आफन्तले बताए।
बालकको चप्पल खोला किनारमा फेला परे पनि शव भने अझै फेला परेको छैन। बाग्लुङ घर भएका विकले चार महिनाअघि तातोपानीका दिपक रोकाको घरमा पसल थापेका थिए। बालकलाई केही दिनदेखि फकाउने गरेकोले निकेशका आफन्तले उनीमाथि शंका गरेका थिए। विकले बालबालिका फकाउने, फलामको औंठी बनाई लगाइदिने जस्ता काम गर्ने गरेको निकेशकी हजुरआमा होमकुमारी घर्तीमगरले जानकारी गराएपछि प्रहरीले पक्राउ गरी अनुसन्धान थालेको थियो। विकविरुद्ध प्रहरीले बालक अपहरण र हत्याको अभियोगसहित मंगलबार जिल्ला अदालतमा मुद्दा हालेको छ। आफन्तले प्रहरी स्रोत :नागरिक न्युज 
Kantipur Fm 
0 commentaires