प्रेमले अन्धो बनाएपछि....!

खोटाङ, २० साउन : आयुर्वेद औषधालय खोटाङको छैटौँ सहायक कर्मचारी रामकिशोर मण्डल विभागको काममा भन्दै आठ दिनअघि कार्यालयकी पियन सीता परियारसँग फरार भएपछि आजसम्म नफर्केको औषधालयका कर्मचारीहरुले बताएका छन् । मण्डलले कार्यालयकी पियन २६ वर्षीया सीता परियारसँग अनैतिक सम्बन्ध राख्दै आएको भन्ने बाहिरी हल्ला चलिरहेकै बेला दुवै जना बेपत्ता भएका छन् । चार जना छोरीका बाबु बनिसकेका मण्डलले अविवाहित सीता लिएर बेपत्ता भएपछि उनका श्रीमतीसमेत चिन्तित बनेकी छिन् ।कार्यालयका निमित्तप्रमुख अजयकुमार झा र लेखापाल नीलकमल निरौला एकसाथ विभागीय कामका लागि काठमाडौँ गएको मौका छोपी मण्डलले पनि सात दिनको काज मिलाएर केटीसँग फरार भएका हुन् ।कार्यालयका एक कर्मचारीले भने— ‘पटकपटक फोन गर्दा पनि सम्पर्क हुँदैन, उनीकहाँ छ भन्नेबारे कसैलाई थाहा छैन । काज अवधि सकिसक्यो तर आएका छैनन् ।’ करारमा जागिर खाँदै आएकी पियन सीता परियारको गत असार मसान्तमा नै अवधि सकिएपनि उनलाई अझै कार्यालयमा हाजिर गर्न दिइएबाट त्यहाँ कार्यरत कर्मचारीहरु चकित छन् । विभागले परियारको करार म्याद नथपे पनि रामकिशोर मण्डलले कुनै प्रक्रिया नअपनाई अन्य कर्मचारीहरुको छेउमै हाजिर गर्न लगाएको उनीहरुको भनाइ छ ।आक्रोशित हुँदै औषधालयका एक कर्मचारीले भने— ‘हाकिम र लेखापाल नभएको मौका छोपी मण्डलले सीतालाई हाजिर गरायो, फेरि पनि त्यसै ग¥यो भने प्रमुख जिल्ला अधिकारीलाई उजुरी गर्छु ।’स्रोतका अनुसार यी दुई जना अहिले जनकपुरमा रहेको जनाइएको छ । यता, मण्डलको श्रीमती भने चार छोरी च्यापेर श्रीमान्ले खोलिदिएको औषधि पसलमा श्रीमान्को बाटो पर्खेर बसिरहेकी छिन् ।  कार्यालयका सबै कर्मचारी बाहिर गएपछि जिल्ला औषधालयमा चौथो सहायक जदाशङ्कर झा मात्र कार्यरत छन् । दैनिक २० जनासम्म सेवाग्राही आउने औषधालयमा अन्य कर्मचारी नभएपछि दैनिक कामकाजमा समेत समस्या भएको जनाइएको छ ।मेचीकाली