भक्तपुर, साउन २- भक्तपुरमा पछिलो समय अवैध डरलको ठगी बढिरहेका बेला सुनको नक्कली कारोबारले तीब्रता पाएको छ। भक्तपुर नपा-७, कमलविनायकस्थित शिवकुमार थापालाई नक्कली सुनको खरिद बिक्रीमा भारतीय मूलका तीन जना गिरोहले ठगी गरेको हो। लामो समयदेखि उनीसँगै सामिप्य रहेका तीन भारतीय व्यक्तिले प्रलोभनमा पारी ४ किलो ४ सय ग्राम सुन भनी ४ सय ७ वटा भिक्टोरिया १८९१ अङ्कित सिक्का दिएर ठगी गरेका हुन्। एक महिनादेखि कारोबारको संवाद गरिरहेका थापा र सो गिरोहबीच साउन १ गते बिहान थापाको निजी निवासमा पुगेर सक्कली सुनका तीन चार वटा सिक्का देखाई दिउसो ३ बजेतिर आएर ४ सय ७ थान सिक्का दिई ३५ लाख रुपियाँ लिएर भागेका थिए। थापाले लिएको सुन राष्ट्रिय वाणिज्य ब्याङ्कमा राख्न जाँदा नक्कली भएका थाहा पाएका थिए। प्रहरी प्रभाग जगातीका अनुसार हालसम्म गरिएको अनुसन्धानमा दुवै पक्ष दाषी देखिएको छ। प्रभागका प्रहरी निरीक्षक केशव थैवका अनुसार भारी मात्रामा सुनको कारोबार गैरकानुनी भएको भन्दै गिरोहको खोजतलास भइरहेको र ठगिएका थापा पनि प्रहरी निगरानीमा रहेको उक्त कार्यालयले बताएको छ। कारोबारपश्चात् सो गिरोहले थापालाई केरा खुवाई लठ्ठ पारेका कारण भाग्न सफल भएको उनको पारिवारिक स्रोतले बताएको छ। थापा भने अनुसन्धानमा अवरोध आउने भन्दै हालसम्म सो घटनाबारे सञ्चारकर्मीलाई प्रतिक्रिया दिन मानिरहेका छैनन्। गिरोहमा ५०-५५ वर्षका एक पुरुष, अन्दाजी ४० वर्षकी एक महिला र २० वर्षका एक युवक संलग्न रहेको प्रहरीले बताएको छ। गैरकानुनी सुन खरिद बिक्रीमा संलग्न देखिएका राष्ट्रिय अनुसन्धानका डिएसपी रहिसकेका शिवकुमार थापाबाट थप रहस्य खुल्न सक्ने प्रहरीले जनाएको छ। - रोशन शिल्पकार
source:-nagriknews
Kantipur Fm 
0 commentaires