एक्लैले २७ लाख खर्चेर खानेपानी

Share

श्रीकृष्णगण्डकी (स्याङ्जा)- , श्रावण १ - कतिपय समाजमा छुवाछूत प्रथा अझै हटिसकेको छैन । तर श्रीकृष्णगण्डकीको गुरुङदीका एक दलितलाई स्थानीय बासिन्दाले 'भगवानै' मान्छन् । २७ लाख रुपैयाँ निजी लगानीले गाउँमा खानेपानी योजना बनाइदिएपछि तेजप्रसाद विश्वकर्मा सबैका प्रिय बनेका हुन् । गाउँमा पानीको कुनै स्रोत थिएन । गाउँलेहरू दुई-तीन घन्टा हिँडेर छिमेकी गाउँहरू श्याम्दी, घोरपान्दी, पहिरो खोलाबाट ल्याउँथे । विश्वकर्माले गाउँभन्दा तलको माझखोलाबाट ५ सय मिटरमाथि पानी तानेर ट्यांकीमा जम्मा गरी वितरण गर्ने व्यवस्था मिलाएका हुन् ।  'गाउँमा पानीको निकै समस्या थियो,' स्थानीय भुवानन्द न्यौपानेले भने, 'उनले पुस्तौंदेखिको दुःख बिर्साइदिए ।' अहिले गाउँमा १२ वटा धारा बनाइएको छ । ७५ घरधुरीले खानेपानी उपयोग गर्छन् । 'सबैलाई पायक पर्ने ठाउँ मिलाएर टोल-टोलमा धारा राखिएको छ,' सन्तलाल खानेपानी उपभोक्ता समितिका अध्यक्ष दिलबहादुर सुनारले भने, 'सामूहिक धाराबाट छुट्टाछुट्टै पाइप जडान गरी घर-घरमा पनि पानी पुगेको छ ।' करिब १५ हजार लिटर क्षमताको पानी ट्यांकी छ । हरेक दिन १२ हजार लिटर पानी वितरण हुने समितिले जनाएको छ । पानी भएपछि गाउँमा सरसफाइ बढेको न्यौपानेले बताए । 'हरेक वषर्ामा झाडापखाला हुन्थ्यो तर धाराको पानी पिउन र अन्य सफाइ गर्न पाएपछि कसैलाई झाडापखाला लागेको छैन,' उनले भने ।  स्थानीय कविता थापाले समय बचेको बताइन् । 'कहिलेकाहीं त छोराछोरीले समेत पानी बोक्नुपर्ने हुँदा स्कुल जान पाउँदैनथे,' उनले भनिन् ।  विश्वकर्माले हजुरबुबा सन्तलाल स्मृतिमा आयोजना निर्माण गरेका हुन् । उनले निर्माण सामग्री र ढुवानी खर्च तथा नगद सहयोग गरेका थिए भने गाउँलेले श्रमदान । आयोजना २०६७ असारमा सुरु भएको थियो । 'सानो छँदा स्कुल नगई पानी बोक्नुपथ्र्याे,' हाल बुटवलमा बस्दै गर्दै आएका उनले सम्भिmए, 'त्यति बेलाको दुःख सम्झेर अहिले खानेपानीमा सहयोग गरेको हुँ ।' आयोजना सञ्चालन गर्न प्रत्येक घरबाट मासिक २ सय रुपैयाँ संकलन गरिएको छ । उक्त रकमले लिफ्ट गर्दाको विद्युत् खर्चदेखि भविष्यमा अन्य मर्मतका काम गर्ने योजना समितिको छ ।

source:-ekantipur