नेपाल र जोर्डन आज भिड्दै

काठमाडौं, साउन ७ - इस्ट टिमोरलाई ७-१ गोलले पराजित गर्दै विश्व कप छनोटको अभियानमा जुटेको नेपाल एसिया कपको क्वार्टर फाइनलिस्ट जोर्डनविरुद्ध अमान रंगशालामा उत्रिँदैछ। शनिबार नेपाली समयअनुसार राति आयोजना हुने 'अवे' खेलमा जोर्डनविरुद्ध उत्कृष्ट नतिजाका लागि आफू लालायित रहेको नेपालका लागि बेलायती प्रशिक्षक ग्राह्म रोबर्ट्सले बताएका छन्।     उनले शुक्रबार खेलपूर्व आयोजित पत्रकार सम्मेलनमा आफ्नो टोलीमा कुनै समस्या नरहेको र राम्रो नतिजाका लागि तयार रहेको स्पष्ट पारेका छन्। 'जोर्डन राम्रो टोली हो। मैले उनीहरूलाई कमजोर आँकेको छैन,' रोबर्ट्सले पत्रकार सम्मेलनमा भने। उनले जोर्डनी प्रशिक्षक अदनान हमदले भनेजस्तै एकोहोरो खेल नहुने स्पस्ट पारे। नेपालले शनिबार हुने पहिलो लेगको खेलमा गोलरक्षक किरण चेम्जोङका साथै डिफेन्डरमा कप्तान सागर थापा, रोहित चन्द, सन्दीप राई र मिडफिल्डरमा विराज महर्जन, निराजन खड्का, भोला सिलवाल, शिव श्रेष्ठ, विकास सिंह क्षेत्रीलाई खेलाउने सम्भावना बलियो छ। यस्तै, स्ट्राइकरमा अनिल गुरुङ र जुमनु राईलाई उतार्ने सम्भावना छ।  विश्वकप छनोटअन्तर्गत बिहीबार जोर्डनतर्फ लागेको नेपाली टोलीले शुक्रबार खेल आयोजना हुने अमान रंगशालामा हल्का अभ्यास गरेको थियो। 'सबै खेलाडी फिट छन्,' सहायक प्रशिक्षक मेघराज केसीले भने। यसअघि नेपाललाई कमजोर प्रतिद्वन्द्वीका रूपमा आँकेको जोर्डनका सहायक प्रशिक्षक अहमद अबेर अल गद्दरले केही समयअघि नेपालमै भएको उत्तर कोरियाविरुद्ध नेपालको खेलको प्रशंसा गरे। 'हामीले त्यो खेलको भिडियो हेरेका थियौं। यसले हामीलाई आश्चर्यमा पार्‍यो। नेपाल राम्रो टोली हो, यसमा युवाको बाहुल्य छ,' उनले भने। उनले आफ्नो टोलीका दुई खेलाडी इन्जरी समस्याबाट गुजि्ररहेको बताए। नेपालले छनोट अन्तर्गत जोर्डनविरुद्ध 'होम' गेम साउन १३ गते काठमाडौस्थित दशरथ रंगशालामा खेल्नेछ।

source:-नागरिक