घाइते अवस्थामा साउदीको जेलमा

Share

वैदेशिक रोजगारीका लागि साउदी अरव पुगेका पाँच युवा अहिले घाइते अवस्थामा विना उपचार त्यहाँको जेलमा रहेका छन् । १५ दिनअघि दुर्घटनामा परेर घाइते भएका ती युवालाई साउदी प्रहरीले पक्राउ गरी थुनेको हो । घाइते अबस्थामा साउदी अरबको दमामको जेलमा रहेका ती युवालाई तत्काल मुक्त गरेर उपचारमा गरिदिन तिनका आफन्तजनले आग्रह गरेका छन् । पक्राउ परेकामध्ये मोरङ राजघाट ९का प्रफूल्ल अहंकारी (गिरी), राजघाट ५का टिकाराम गौतम, इलामका शंकर पौडेल रहेका छन् ।अन्य दुइजनाको परिचय खुलेको छैन । उनीहरू पक्राउ परेको १४ दिनपछि हिजो राति भाइसँग सम्पर्क भएको प्रफूल्लका दाजु यज्ञनिधिले बताए ।दुइ बर्षका लागि वैदेशिक रोजगारीमा साउदी अरव गएका प्रफूल्लको अझै एक महिनाको समयअवधी बाँकी रहेको यज्ञनिधिले बताए ।स्थानिय एक ओभरसिजबाट गएका प्रफूल्ललाई चालकमा रोजगारी पाइन्छ भनेर लगिए पनि बढार्ने काम दिइएको परिवारले जनाएको छ । कार दुर्घटना हुँदा चालक पाकिस्तानी नागरिकको घटनास्थलमै मृत्यु भएको र अन्यलाई घाइते अबस्थामा पक्राउ गरिएको टेलिफोनमा आफूहरुले जानकारी पाएको परिवारले जनाएका छन् ।    उनीहरुलाई छुटाउन साउदीस्थित नेपाली दुताबासमा जाँदा त्यहाँका कर्मचारीले जनही १०हजार रुपैंया कमिसन मागेको आफन्तहरुले बताएको यज्ञनिधिले जनाएका छन् । सरकारले नै पहल गरेर उनीहरुलाई जेलबाट तत्काल छुटाएर उपचार गरिदिनु पर्ने परिवारको माग छ ।

पूर्वेली टाईम्स