'भ्रष्टाचार शून्य पार्छु'

काठमाडौ, जेष्ठ २० - नवनियुक्त प्रहरी महानिरीक्षक रवीन्द्रप्रताप शाहले देश र जनताप्रति केन्दि्रत रहेर प्रहरीलाई भ्रष्टाचारशून्य बनाउने प्रतिबद्धता व्यक्त गरेका छन् । पद बहालीपश्चात् बिहीबार प्रहरी प्रधान कार्यालयमा आयोजित समारोहमा उनले उपत्यकास्थित प्रहरी अधिकृत तथा जवानहरूलाई निर्देशन दिने क्रममा उक्त प्रतिबद्धता जनाएका हुन् ।  आफूमा कुनै आग्रह-पूर्वाग्रह नभएको चर्चा गर्दै शाहले प्रत्येक प्रहरी कर्मचारीको कार्यसम्पादन मूल्यांकन गर्ने प्रणाली संस्थागत गर्ने प्रतिबद्धतासमेत व्यक्त गरे । उनले  संगठनमा एकल व्यक्तिको प्रयासबाट मात्रै उद्देश्य हासिल हुन नसक्ने बताउँदै सबै निकायका प्रत्येक सदस्यले आफ्नो कर्तव्यलाई जिम्मेवार रूपमा बहन गरे मात्रै व्यावसायिक प्रहरीको परिकल्पनालाई मूर्त्तरूप दिन सकिने बताए ।   गृह मन्त्रालयमा बिहान साढे ८ बजे महानिरीक्षकको दज्र्यानी चिह्न लगाएर प्रहरी मुख्यालय छिरेका शाहलाई मुख्यालय र उपत्यकास्थित वरिष्ठ प्रहरी अधिकृतहरूले पंक्तिबद्ध भई स्वागत गरेका थिए । शाहले महानिरीक्षक भएपछि परम्पराअनुसार मुख्यालय छिरेलगत्तै अमर प्रहरी स्मारकमा गई श्रद्धाञ्जलि अर्पण गरेका थिए । २०१४ असार १६ गते धादिङ, मैदी गाउँमा जन्मेका शाह २०३९ सालमा प्रहरी निरीक्षक दर्जाबाट सेवामा प्रवेश गरेका थिए । यसअघि नवनियुक्त प्रहरी महानिरीक्षक शाहलाई बिहीबारै गृहसचिव लीलामणि पौडेलले दज्र्यानी चिह्न लगाइदिएका थिए ।   

ekantipur