यौन दुर्व्यवहार मुद्दा लागेकी प्रहरीलाई सफाइ

काठमाडौं, जेठ १८ - युवती अपहरण र यौन दुर्व्यवहारको अभियोग लागेकी थापाथली ट्राफिक प्रहरी रमिना हुसेनले अदालतबाट सफाइ पाएकी छिन्। १५ महिनाअघि १७ वर्षीया पूजन बस्नेतलाई अपहरण गरेको अभियोगमा प्रहरी पक्राउमा परेकी उनलाई मंगलबार काठमाडौं जिल्ला अदालतका न्यायाधीश लेखनाथ घिमिरेले निर्दोष ठहर गर्दै सफाइ दिएका हुन्।      अदालतमा मुद्दा दायर भएसँगै जागिरबाट निलम्बनमा परेकी उनी बुधबार काममा फर्कंदै छिन्। 'बिनागल्ती एक महिना झुटा मुद्दा लागेर प्रहरी हिरासतमा रहे पनि समलिंगीको मुद्दामा जितेकाले खुसी लागेको छ,' उनले  भनिन्, 'भोलिदेखि नै अफिस जान्छु।' महिला समलिंगी भएकै कारण आफूलाई प्रहरीले दुख दिएको उनले बताइन्। २०६६ फागुन २४ गते उनलाई काठमाडौं ढल्कोको डेराबाट पक्राउ गरी जिल्ला अदालतमा अपहरण तथा शरीर बन्धक मुद्दा लगाइएको थियो।  उनले प्रेम र विवाह गरी सँगै बसेको भने पनि प्रेमिकाका आफन्तले समलिंगी सम्बन्ध स्वीकार्न नचाहेकाले दुख दिएको बताइन्। २७ वर्षीया उनलाई प्रहरीले एक महिना अनुसन्धानका लागि भन्दै हिरासतमा राखे पनि जिल्ला अदालतले २०६६ चैतमा १५ हजार धरौटीमा रिहा गरेको थियो। त्यही मुद्दाको अन्तिम सुनुवाइ गर्दै मंगलबार जिल्ला अदालतले रमिनालाई सफाइ दिएको हो।

nagriknews