थानाभित्रै विहे

 मन कुमार जेठ २७ बेलडाँगी -३ जन्ती, लोकन्ती केही थिएनन्, भोज भतेर हुने कुरै भएन । दाइजो-उपहार त झन परकै कुरो रह्यो । उमेर पुगेको युवक र युवती प्रहरी कार्यलयको एकाछेउमा रहेको मन्दिरमा जुटे । युवकले गोजीबाट निकाले सिन्दुरको बट्टा । युवतीले शिर ठाडो पारेर सिउँदो थापिदिइन् । सिन्दुर र पोते लगाइदिए युवकले । वरपर जुटेका केहिले ताली बजाए । त्यस्तै पाँच मिनट नवित्दै एकपाराको बिहे सकियो । यो फिल्मको दृश्य होइन अनि कुनै बनिबनाउ कथाको अंश पनि होइन । यो एउटा वास्तविक वेहुला र वेहुली बीचको एउटा विवाहको दृष्य थियो । बिहेका पात्र थिए बेलडाँगी -३ शरणार्थी शिविरका अर्जुन दर्जी र त्यही शिविरकी तारामाया गुरुङ्ग ।  अन्तरजातीय बिहेलाई शरणार्थी शिविरका अभावग्रस्त समाजमा पनि स्वीकार नगरिएका कारण ती युवायुवतीले आफुखुसी बिहे गरेको बताइएको छ । बिहेको सुरक्षा र बैधानिकताको बाटो सोचेर तिनले ठाँउ चाँहि प्रहरी कार्यालय रोजेको बताएका छन् । तिनीहरुबीच केही वर्षदेखि प्रेम झाँगिएको थियो । त्यसको बिसौनी बन्यो इलाका प्रहरी कार्यलयको सानो आँगनी । इलाका प्रहरी कार्यालय दमकले दमकको प्रहरी हाताभित्र यसरी बिहे भएको यो पहिलो घट्ना भएको बताइएको छ ।