भीम चापागाईं इलाम,५ वैशाख स्थायी नियुक्ति पाएको वर्षदिन पनि नबित्दै तत्कालीन विद्रोही माओवादीको धम्कीका कारण नोकरीबाट विस्थापित कन्यामका एक शिक्षक रोगको उपचार गर्न नसक्दा ओछ्यानमै थलिएका छन् । रगत क्यान्सरबाट पीडित कन्याम-८ गोगनेका ४३ वषर्ीय केशव पौडेल उपचारका लागि रुपैयाँ नभएपछि दुई महिनादेखि रोग पालेर घरमै बस्न बाध्य भएका हुन् ।
पाँचथरको लुङरुपा- ५ स्थित महादेव गुप्तेश्वर माध्यमिक विद्यालयमा कार्यरत पौडेलले निम्न माध्यमिक तहमा स्थायी नियुक्ति पाएको एक वर्ष नबित्दै माओवादीको ज्यान मार्ने धम्की आएपछि जागिरै छाड्न बाध्य भएका थिए । पौडलले ०६२ सालमा निमावि तहमा नियुक्त भएर ज्यान बचाउनकै लागि ०६२ चैत २० मा जागिरबाटै राजीनामा गरेका थिए ।
पौडेललाई उपचारका लागि गाउँ विकास समितिको कार्यालय कन्याम, जिल्ला अस्पताल र नागरिक समाजले आर्थिक सहायता गर्न सरकारलाई सिफारिस गरेका थिए । तत्कालै ५० हजार रुपैयाँको औषधि निःशुल्क दिने घोषणा गरेको स्वास्थ्य मन्त्रालयले अहिलेसम्म १२ हजार ४३ रुपैयाँ मात्रै दिएको शिक्षक पौडेलकी छोरी शर्मिलाले बताइन् ।
वीर अस्पताल काठमाडौंमा उपचार गराउँदा गराउँदै अस्पतालले औषधि बाँकी दिन नमिल्ने बताएपछि शिक्षक पौडेललाई फर्काएर घरमै ल्याउन बाध्य भएको शर्मिलाले गुनासो गरिन् । 'पैसा र औषधि दुवै नभएकाले बुबालाई दुई महिनायता उपचारविना नै घरमा राख्न बाध्य छौँ,' उनले भनिन् ।
उपचारका लागि प्रयोग हुने औषधि नेपालमा नपाइने र अत्यन्तै महँगो पर्ने भएकाले आर्थिक अभावका कारण उपचारै गर्न नसकेको उनको भनाइ छ । पौडेललाई पीडा कम हुने र निद्रा लाग्नेबाहेक अन्य औषधि गर्न नसकेको पौडेल परिवारले बताए ।
उपचारका लागि दिने सेवा र सरकारले दिने भनेको औषधि भए बाबु बाँच्ने आशा बोकेकी शर्मिलाले प्रधानमन्त्री झलनाथ खनाल एक साताअघि इलाम आएका वेला अनुरोध पत्र पेस गरेकी थिइन् । 'बुबा झन् सिकिस्त हुँदै गए पनि मेरो अनुरोधपत्रको कुनै प्रतिक्रिया आएको छैन,' उनले भनिन्, 'मेरो बुबालाई बचाउने काममा सबैले सहयोग गरिदिन अनुरोध गर्दछु ।'
source:-nayapatrika



0 commentaires