शृंखलाबद्ध चोरी गर्ने सैनिक पक्राउ

 केदार ओझा काठमाडौ, वैशाख ४ - सिंहदरबारभित्रै र आसपासमा शृंखलाबद्ध चोरी गर्ने नेपाली सेनाका एक नायकलाई पक्राउ परेका छन् । सिंहदरबार परिसरभित्रको सुरक्षा हेर्ने नारायण दल गणमा कार्यरत बागलुङ, मालारानी-१ का रोमबहादुर मल्ललाई प्रहरीले केही दिनअघि पक्राउ गरेको हो ।

मल्लले हालसम्म १५ भन्दा बढी स्थानमा चोरी गरेको स्वीकारेका छन् । 'म एक दिनमा तीनदेखि पाँच ठाउँमा ताला फोरेर चोर्ने गथेर्ं,' प्रहरीसँगको बयानमा मल्लले भने, 'एक स्थानमा चोरी गर्न बढीमा १५ मिनेट लाग्थ्यो ।'

पक्राउ परेको चार दिनपछि बल्लतल्ल उनले प्रहरीलाई कोठा देखाए । त्यहाँबाट प्रहरीले चोरीका ८२ प्रकारका धनमाल बरामद गरेको छ । २० लाख रुपैयाँभन्दा बढी पर्ने ती सामानहरूमा दसौ तोलाका सुनका बाला, छड्के तिलहरी, सिक्री, ब्रासलेट, चुरा, औंठी, टपदेखि एलसीडी मनिटर, टिभी, कम्प्युटर र खुत्रुकेमा राखेको खुद्रा पैसासम्म छन् । चाँदीका गहना दुई किलोभन्दा बढी र महँगा ११ वटा महँगा मोबाइल सेट बरामद गरेको छ ।

दिउँसो १२ देखि २ बजेसम्म घर फोरेर चोरी गर्ने र सामान सबै बिजुली बजारस्थित डेरामा थन्क्याएर सुटुक्क सिंहदरबार भित्रको ब्यारेक जाने गरेको उनले बताएका छन् । चोरी गरेका सामान बेचेरै मल्लले एभरेस्ट बैंकमा तीनवटा खाता खोली पाँच लाख रुपैयाँ 'फिक्स डिपोजिट' मा राखेकोसमेत पाइएको प्रहरीले जानकारी दियो ।

सिंहदरबारभित्रका सुरक्षाकर्मी बिनाअनुमति सिंहदरबार परिसर बाहिर निस्कनै पाउँदैनन् । मल्लले दैनिक खाना खानेबित्तिकै आफू सिंहदरबारबाट बाहिर निस्कने निजी गाडीमा परिचयपत्र देखाएर 'लिफ्ट' माग्दै बाहिर निस्कने गरेको बयान दिएका छन् ।

बानेश्वर प्रहरी वृत्तबाट नियमित जाँचका लागि साइकलमा खटिएका तीन प्रहरीले उनलाई शंकास्पद अवस्थामा भेटेर पक्राउ गरेपछि यो तथ्य खुलेको हो । खैरो झोला बोकेर हिँडिरहेका मल्ललाई रोकेर जाँच गर्न खोज्दा उनी झोला छाडेर भागेका थिए । प्रहरीले तत्कालै झोला हेर्दा त्यसमा घर फोर्न प्रयोग गरिने 'बोल्ट कटर' फेला पारेको थियो । त्यसपछि प्रहरीले उनलाई दौडेर

पछ्याई पक्राउ गरेको थियो । मल्लले तीनै प्रहरीलाई हप्काउँदै पन्छाउन खोजेका थिए । तर स्थानीय बासिन्दाको सहयोगमा प्रहरीले हतकडी लगाई उनलाई कार्यालय ल्याएको थियो ।

बानेश्वर वृत्तमा ल्याइसकेपछि उनले आफू सेनामा कार्यरत रहेको बताउँदै उम्कने अन्तिम प्रयास गरेका थिए । प्रहरीले सैनिक भएको पत्ता लागेपछि छाड्न खोजेको थियो । त्यसैबीच एक अधिकृतले मल्लको शरीर खानतलासी गर्दा उनको साथमा ७२ हजार नगद र 'ब्ल्याकबेरी' भेटियो । त्यसपछि प्रहरीले थप अनुसन्धान थालेको थियो । बरामद ब्ल्याकबेरीमा सुरेश पौडेल नाम गरेका व्यक्तिको इन्टरनेट ठेगाना भेटिएको थियो । ती व्यक्ति को हुन् भन्ने सोध्दा मल्लले स्पष्ट जवाफ नदिएपछि अनुसन्धान गरिरहेका अधिकृतले सम्भिmए केही दिनअघि एक इन्जिनियरले घर फोरेर ब्ल्याकबेरी हराएको निवेदन दिएको सम्भिmए । तत्कालै रेकर्ड हेर्दा एनसेलमा कार्यरत सुरेश पौडेल नै उजुरी दिएको एकिन भएपछि प्रहरीले उनलाई फोन गर्‍यो । त्यसपछि उक्त ब्ल्याकबेरी चोरीको भएको खुलेको थियो । त्यसपछि मल्लले एकपछि अर्को स्थानमा चोरी गरेको स्वीकारे ।

दिनको १२ देखि २ बजेसम्म दुईवटा चोरी हुने सिंहदरबार आसपासमा मल्ल पक्राउ परेपछि कुनै घटना नभएको दाबी प्रहरीले गरेको छ ।

मल्ल वर्षौंदेखि चोरीमा लागेको तथ्य प्रहरीले पत्ता लगाएको छ । घर सनाखत गराउनुका अतिरिक्त प्रहरी अहिले मल्लको कोठामा भेटिएको एल्बममा रहेकी युवतीको खोजीमा लागेको छ । विभिन्न हाउभाउमा तस्बिर खिचेर सिंगो एल्बम बनाएका उनले ती युवतीबारे अझै केही खुलाएका छैनन् । मल्ल अहिले नेपाली सेनाको हिरासतमा छन् । प्रहरीले दैनिक पत्र काटेर ल्याउने र सेनालाई बुझाउने गर्दै आएको छ । सेनाले पनि मल्लबारे अनुसन्धान थालेको बताएको छ ।

source:-ekantipur