काठमाडौ, पुस २० - प्रेमकथामा आधारित 'न बिर्सें तिमीलाई न पाएँ तिमीलाई' फिल्मका गीति एल्बम सोमबार सार्वजनिक गरिएको छ । माघ ३० देखि प्रदर्शनमा आउन लागेको फिल्मका गीतहरूको सीडी नाबालकको हातबाट गराइएको हो । दुई वर्ष आठ महिनाकी समृद्धि लामिछाने र चार वर्षका प्रथम श्रेष्ठले संयुक्त रूपमा लोकार्पण गर्दा सञ्चारकर्मीबाट घेरिएपछि समृद्धि अत्तालिएर रोएकी थिइन् । उनी आमा सरिता लामिछानेको काखमा बसेपछि मात्र फुलिएकी थिइन् भने फिल्मकै निर्माता प्रज्ञा जोशीका छोरा प्रथम भने लोकार्पण सकेपछि मञ्चमै ढुक्कै बसेका थिए ।
विपीन किरणको शब्द र महेश खड्काको संगीतमा अञ्जु पन्तले गाएको चर्चित गजलबाटै फिल्मको शीर्षक जुराइएकोबारे फिल्मका निर्देशकले भने, 'फिल्मको स्त्रिmप्ट तयार भइसकेपछि शीर्षकको खोजी भइरहँदा उक्त गजलले नै फिल्मको मर्म बोक्ने ठान्यौं र शीर्षक मात्रै प्रयोग गरेनौं, गजललाई नै समावेश गर्यौं ।'
त्यसबाहेक फिल्ममा चार गीत समावेश गरिएको छ । जसमा एक नवराज लम्सालबाहेक अरू सबैमा संगीतकार महेश खड्काकै शब्द छन् । 'अचेलभरि मनमा...,' 'सागर सुक्ला आकाश झुक्ला...,' 'कि त्यो घाम डुबेपछि...' र 'पहिलो प्रेम...' गीतहरूमा मीना नेपाली, बाबु बोगटी, प्रविशा अधिकारी र स्वरूपराज आचार्यले गाएका छन् । अन्तिम गीतमा सत्य-स्वरूपले संगीत दिएका हुन् । अडियो सीडीको बजार व्यवस्थापन सम्झना अडियो एन्ड भिडियोले गरेको हो ।
प्रज्ञा फिल्मस्को ब्यानरमा बनेको फिल्म 'न बिर्सें तिमीलाई न पाएँ तिमीलाई' बच्चैदेखिका तीन साथीहरूको कथामा आधारित प्रेमकथामा आधारित विशुद्ध मनोरञ्जनात्मक फिल्म भएको निर्देशक घिमिरेले बताए । जसमा विराज भट्टले प्रतिष्ठित व्यवसायी, बाबुले डाक्टर र झरनाले डान्सरको पेसा अँगालेका हुन्छन् । शीर्षकअनुरूप नै वियोगान्त बनेको फिल्ममा विराज र बाबु दुवैले झरनालाई प्रेम गरेको भए पनि उनी भने त्यसलाई साथीत्वको रूपमा मात्रै लिइरहेकी हुन्छिन् । एक्सन हिरोका रूपमा बढी देखिने विराजलाई निर्देशकले यसमा लभरब्यायको रूपमा देखाउन खोजेको बताएका छन् ।
सोभितको ँचिनो’ पनि सँगसँगै
उता निर्देशक सोभित बस्नेतको फिल्म 'चिनो' पनि पुस ३० गते नै देशव्यापी प्रदर्शनमा आउने भएको छ । मंगलबार अडियो तथा भिडियो सार्वजनिक गर्न लागिएको उक्त फिल्म पूर्णतः एक्सनप्रधान बताइएको छ ।
विराज भट्ट, रमित ढुंगाना, धीरेन शाक्य, राजेन्द्र खड्गी, रेजिना उप्रेती, जयकिशन स्नेतलगायतको मुख्य भूूमिका रहेको फिल्मका लागि नायिका उप्रेतीले केही स्टन्ट र एक्सनका दृश्यसमेत दिएकी निर्देशकले बताए । 'फिल्मकै लागि भनेर एक महिना हर्स राइडिङ कोर्ससमेत गरेकी थिइन्,' निर्देशक बस्नेतले फिल्ममा रेजिनाको भिडन्त तेस्रोलिंगी परिचय बोक्ने काजोल म्याडमका रूपमा देखिने खुंखार भिलेनसँग हुनेछ ।
शम्भुजित बाँस्कोटाको संगीत तथा शिव विकको कोरियोग्राफी रहेको फिल्ममा अधिकांश दृश्य भने भिडन्तका रहेको बताइएको छ । निर्देशक बस्नेत आफ्नो फिल्ममा नायिका रेजिना र भिलेन राजेन्द्र खड्गीले हावामा फाइट खेलेको, फाइटरहरू सबै सोमालियाली रहेकाले पनि फिल्म हेर्ने दर्शकले रोमाञ्चक महसुस गर्ने दाबी गर्छन् ।
source:-kantipur
Kantipur Fm 
0 commentaires