मलंगवा, भाद्र २४ - शिक्षा दिवसको अवसरमा मलंगवा जेसिजले "२९ औं तारा रनिङ्ग शिल्ड अन्तर मावि हाजिरीजवाफ प्रतियोगिता २०६७" आयोजना गरेको छ ।
मलंगवामा आयोजित उक्त प्रतियोगितामा जिल्लाभरका निजी तथा सरकारी गरी ४१ विद्यालयका विद्यार्थीहरु सहभागी छन् । बुधबारबाट सुरु उक्त हाजिरीजवाफ प्रतियोगिता विहिवार सम्पन्न हुने आयोजक जेसिजले जनाएको छ ।
२९ वर्ष पहिले मलंगवा जेसिजका तत्कालिन अध्यक्ष मुक्ति गोविन्द वैद्यले स्थापना गरेको "तारा रनिङ्ग शिल्ड" अन्तर्गत यस वर्ष पनि शिक्षा दिवसको अवसरमा हाजिरी जवाफ प्रतियोगिताको आयोजना गरिएको मलंगवा जेसिजका अध्यक्ष मुकेश मिश्रले जानकारी दिए ।
सर्लाहीका प्रमुख जिल्ला अधिकारी शम्भु घिमिरेले उदघाटन गरेको उक्त प्रतियोगिता समारोहको अध्यक्षता मलंगवा जेसिजका अध्यक्ष मुकेश मिश्रले गरेका थिए । कार्यक्रममा जेसिजका केन्द्रीय पदाधिकारीहरु लगायत मलंगवा जेसिजका पूर्व अध्यक्षहरुको उपस्थिति रहेको थियो । प्रत्येक वर्ष जेसिजले हाजिरी जवाफ प्रतियोगिता गराउँदै आएको छ ।
Kantipur Fm 
0 commentaires