एक्लैले १ करोड ७० लाख दान

झापा (काँकडभिट्टा), श्रावण ५ - झापा बुधबारेका एक व्यक्तिले विगत तीन वर्षमा शिक्षा र अन्य क्षेत्रका लागि रु एक करोड ७० लाख बराबरको निजी धन दान दिएका छन् ।  बुधबारे गाउँ विकास समिति–५ निवासी ५३ वर्षीय रमेशकुमार भुजेलले २०६५ सालमा बुधबारेको आदर्श उच्चमाविलाई रु दुई लाख ५५ हजार ५५५ दिएर दानको सुरुवात गरेका थिए ।  उनले बुधबारेको सीता रमेश बहुमुखी क्याम्पसलाई रु ५८ लाख, दुहागढीको त्रिदेव बहुमुखी क्याम्पसलाई रु २६ लाख, धाइजनको बलभद्र जनता उच्च माविलाई रु ५५ हजार र बाहुनडाँगीको बाल विकास निमाविलाई रु ५५ हजार नगद दान गरेका छन् ।  विद्यालय, मठमन्दिर, खानेपानी आयोजनालगायतका क्षेत्रमा उनले सहयोगलाई केन्द्रित गरे पनि दानको नब्बे प्रतिशत बढी हिस्सा शिक्षा क्षेत्रमा रहेको छ ।  एसएलसीसम्मको मात्र शिक्षा प्राप्त गरेका समाजसेवी भुजेलले गरिबीका कारण आफूले पढ्न नपाएको हुँदा आफ्नो जस्तो अवस्था अरूको नहोस् भनेर गरिब पढ्ने विद्यालय र क्याम्पसमा सहयोग दिएको बताए ।  नेपाली कांग्रेस बुधबारे गाविसका सभापति समेत रहेका भुजेल पछिल्लो समय जग्गा खरिद बिक्री व्यापारमा संलग्न छन् । आफूले आर्जेको मुनाफाको ३० प्रतिशत हिस्सा दानमा खर्च गर्ने सङ्कल्प गरेको उनले बताए ।  रासस