धर्मकर्ममा कम्युनिष्ट नेताहरुको बढ्दो रुची

१२ साउन, काठमाडौं । धेरैले कम्युनिष्टहरु धर्म मान्दैनन् भन्छन् । अझ माओवादी नेताहरु त धर्मकर्मको विरोधी नै हुन् भन्ने छाप बसेको छ । तर, यो सत्य होइन भन्ने कुरा उनीहरुकै व्यवहारले पुष्टी गर्छ । ‘धेरै कम्युनिष्ट नेताहरु धर्मकर्ममा रुची राख्छन्’ ज्योतिषी डाक्टर वासुदेवकृष्ण शास्त्रीले भन्नुभयो-’न्यासध्यानमा विश्वास गर्ने नेताहरुको सूची लामो छ ।’  पार्टीले सरकारमा पठाउने पक्का भएपछि माओवादी उपाध्यक्ष नारायणकाजी श्रेष्ठ प्रकाशले ज्योतिषीलाई चिना हेराउन पठाएको समाचार अनालाइनखबरले प्रकाशित गरिसकेको छ । ज्योतिषीले प्रकाशको चिनामा गृहमन्त्री नजुरेको र गृहमन्त्री भैहालेमा पनि धेरै दिन नफाप्ने बताएका थिए । नभन्दै अहिले शपथ नै हुने नहुने अनिश्चित छ ।  आफू धर्मकर्ममा विश्वास गर्छु भनेर कम्युनिष्ट नेताहरुलाई स्वीकार्न अप्ठेरो लाग्छ । तर, धार्मिक गतिबिधिमा उनीहरुको उपस्थितिबारेको खबर बेलाबेला सार्वजनिक भइरहन्छ । प्रधानमन्त्री भएको बेला प्रचण्डले सुनसरीको चतरामा ग्रहशान्ति गरेको प्रशंग निकै चर्चित भयो । स्रोतका अनुसार प्रधानमन्त्री बन्ने प्रतिष्पर्धाको क्रममा प्रचण्ड परिवारले शक्तिपीठहरुमा गुप्त रुपमा पूजा लगाएका थिए । बंगलामुखीमा पनि केही समयअघि प्रचण्डको ग्रहशान्ति गरिएको थियो ।  पण्डित दीनवन्धु पोखरेल लगायतको कथा वाचनमा हुने महापुराणमा कम्युनिष्ट नेताहरुको बाक्लै उपस्थिति हुने गरेको छ । माओवादीले जनमैत्री अस्पतालको सञ्चालन गर्न यसैगरी महापुराण लगायो । त्यसबेला नेताहरु उपस्थित भएर फूलामाला र टीका पहिरिँदै कथावाचन श्रवण गरेका थिए ।  अरु कम्युनिष्ट नेताहरुसँगै माओवादी नेताहरु पनि विस्तारै विस्तारै आध्यात्मिक बाटोमा आईरहेका दिग्दर्पण नामक मासिक पत्रिकामा उल्लेख छ ।  एमाले नेताहरु पनि उस्तै आध्यात्मिक  प्रधानमन्त्री झलनाथ खनाललाई धर्ममा अगाध विश्वास छ । प्रधानमन्त्री भएर बालुवाटार प्रवेश गर्ने बेला गृहप्रवेश पूजा सहित बोको काटिएको थियो । उहाँ ज्योतिष र वासुशास्त्रमा पनि बढी विश्वास गर्नुहुन्छ । पूर्व प्रधानमन्त्री एवं एमाले बरिष्ठ नेता माधवकुमार नेपाल पनि धर्मकर्ममा बढी रुची राख्नुहुन्छ । प्रधानमन्त्री भएर बालुवाटार प्रवेश गर्दा र छोड्दा उहाँले साईत हेराउनुभएको थियो । पिताले हरेक बिहान गर्ने पूजामा उहाँ सरिक हुनुहुन्छ । एमालेका अर्का नेता केपी शर्मा ओलीमा पनि आध्यात्मिक सोच बढ्दै गएको छ । सार्वजनिक ठाउँमा निस्कनुअघि ओलीलले नीलमजडित औंठी लगाउने गरेको पारिवारिक स्रोतको भनाई छ । बामदेव गौतम, प्रदीप नेपाल, मोदनाथ प्रश्रति लगायतका कट्टर नेताहरु पनि उस्तै आध्यात्मिक छन् ।  राष्ट्रपति, उपराष्ट्रपति र सभामुख  पूर्व राजा र कांग्रेसका पुराना नेताहरुपछि राष्ट्रपति र उपराष्ट्रपतिलाई धार्मिक कार्यक्रममा बढी देख्न सकिन्छ । जानकारहरुका अनुसार राष्ट्रपति डाक्टर रामवरण यादव भगवान राम र कृष्णको नित्य पूजाआराधना गर्नुहुन्छ । राष्ट्रपति भएपछि उहाँले ग्रहशान्ति र सत्यनारायणको पूजा गराउनुभएकेा थियो । उपराष्ट्रपति परमानन्द झा खासगरी शिव र सत्यनारायणको पूजा बढी गर्नुहुन्छ । यस्तै सभामुख सुवासचन्द्र नेम्वाङ दाहिने हातमा पुष्पराज लगाउनुहुन्छ । यस्तै औपचारिक पोशाक लगाउने बेला बाहेक उहाँले बार अनुसारको लुगा लगाउने पारिवारिक स्रोतको भनाई छ ।  किन बढ्छ त आशक्ति ?  धर्मकर्ममा कम्युनिष्ट नेताहरुको समेत झुकाब बढ्नुको कारण के होला त ? नेपाल पञ्चांग निर्णायक समितिका अध्यक्ष डाक्टर माधवप्रसाद भट्टराईले भन्नुभयो-’धर्म विकृति होईन भन्ने यथार्थ बुझ्नुको परिणाम हो ।’ उहाँका अनुसार धर्मले मान्छेलाई मनोबैज्ञानिक बल पनि दिन्छ । धर्मकर्ममा लागेको मान्छेले एक्लो महसुस नगर्ने उहाँको भनाई छ । युवा अवस्थामा धर्मकर्म गर्दिन भन्नेलाई पनि बुढ्यौलीले छुन थालेपछि उसलाई धर्मकर्मले छुन थाल्छ । ४० वर्ष उमेर नाघेपछि अधिकांश मानिस धर्मकर्ममा लाग्ने भट्टराईले बताउनुभयो । ‘कम्युनिष्ट कांग्रेस जो भएपनि बुढ्यौलीमा धर्मकर्ममा लाग्दिन भनेको मान्छे नै भेटिएको छैन’ उहाँले भन्नुभयो ।

source:-onlinekhabar