विराटनगर विमानस्थलमा रात्रीकालिन ‘टु वे’ को तयारी

विराटनगर विमानस्थलमा रात्रीकालिन दुवैतर्फ उडानका लागि टु वे ल्याण्डिङको तयारी गरिएको छ । विमानस्थललाई सुविधासम्पन्न बनाउँदै लाने नीति अनुरुप नेपाल उड्डयन प्राधिकरण विराटनगरले चाँडै यो सुविधा सुरु गर्न लागेको हो । प्राधिकरण विराटनगरका प्रमुख देवानन्द उपाध्यायले रात्रीकालिन टु वे ल्याण्डिङको सेवा उपलब्ध गराउने क्रममा धावनमार्गदेखि पूर्व तर्फको जमिन अधिग्रहण गर्ने प्रकृया सुरु भइसकेको बताउनुभयो । उपाध्यायले केन्द्रसँग बजेट माग गरिसकेको बताउनुभयो । विमानस्थलमा अहिले रात्री उडानको लागि धावनमार्गको पश्चिम खण्ड मात्र प्रयोगमा आइरहेको छ । बर्खायाममा रात्री उडान नभएपनि दशै तिहार छठ र अन्य महत्वपूर्ण चाडपर्व र हिउँदमा जहाजहरुले राती उडान गर्दै आएका छन् । रातीको उडानमा एकतर्फी मात्र धावनमार्गमा सुविधा उपलब्ध भएका कारण अकाशमा ट्राफिक समस्या हुने गरेको र कतिपय बेला विमान फर्केर जानुपर्ने बाध्यता रहेको उपाध्यायको कथन छ । १६ सय मिटर कालोपत्रे विराटनगर विमानस्थलको धावनमार्ग पूर्वतर्फ विस्तार गरेपछि दुई हजार मिटरसम्म पुग्ने प्राधिकरणका अधिकारीहरु बताउँछन् । यसरी धावनमार्ग विस्तारपछि पूर्व तर्फ एप्रोच लाइटको समेत व्यवस्था गरिनेछ । रात्रीकालिन उडानको बेला एप्रोच लाइटले विमानस्थल र धावनमार्ग पहिचान गर्न मद्दत पुग्छ ।

source:-पूर्वेली टाईम्स