नसिरुद्दिनका छोराको काठमाडौँमा कन्सर्ट

सहारा शर्मा, काठमाडौं, वैशाख २५- बलिउड कलाकार नसिरुद्दिन शाह र उनका छोरा इमाद हाल काठमाडौंमा छन्। नसिरुद्दिन नेपाली कलाकारलाई अभिनय सिकाउनमा व्यस्त छन् भने उनका छोरा इमादले शुक्रबार आफ्नो एकल कन्सर्ट गरेका छन्।  

 दरबारमार्गस्थित १९०५ रेस्टुरेन्टमा आयोजित कन्सर्टमा इमादले आफ्नो नयाँ फिल्मका गीत समेत गाए। अभिनेता, गायक र संगीतकार रहेका इमादले केही समयपछि फेरि काठमाडौंमा कन्सर्ट गर्ने बताए। 

     कन्सर्ट हेर्न पुगेका युवाहरूले इमादलाई साथ दिएका थिए। आफ्नो फिल्म ‘४०४'को प्रचारका निम्ति कन्सर्ट गरेका इमाद फिल्मका संगीतकार समेत हुन्। कन्सर्टमा भने इमादले आफ्नो ब्यान्ड ‘द पल्प सोसाइटी'सँग मिलेर गीत प्रस्तुत गरेका थिए। अनौपचारिक रूपमा सुरू भएको कन्सर्टमा इमादले प्रिन्स एन्ड दि रिभोलुसनको ‘किस' गीत प्रस्तुत गरे। त्यसपछि उनलाई भारतीय गायिका एवम् मोडल रसेल भार्घिसले साथ दिएकी थिइन्। मनोवैज्ञानिक थि्रलर भनिएको ‘४०४' फिल्मबाट बलिउडमा प्रवेश गरेका इमादले पश्चिमेली र भारतीय संगीतलाई फ्युजनको रूपमा प्रस्तुत गरेका छन्। पल्स सोसाइटीका एक सदस्यले भने, ‘फिल्ममा गीत गाउन हामीजस्ता युवा पुस्तालाई धेरै समस्या हुँदोरहेछ।'  आयोजक रवीन सिटौलाले यस कन्सर्टले आफूलाई नयाँ कन्सर्ट गर्न प्रेरित गरेको बताए। ‘युवा पुस्तालाई लक्षित गरेर केही समयमै अर्को कन्सर्ट गर्नेछौं,' उनले भने।

@nagrik