मुम्बई, फागुन १० (एजेन्सी)- 'दबंग'की हिरोइन सोनाक्षी सिन्हा दक्षिण भारतका सुपरस्टार कमल हुसेनसँग देखिने भएकी छिन्। निर्देशक सेल्भा मुरुगनले निर्देशन गर्ने फिल्ममा कमलले मनोवैज्ञानिक हत्याराको भूमिका निर्वाह गर्नेछन्। यो फिल्म एन्थनी होप्किन्सको 'ह्यानिबल' बाट प्रभावित हुनेछ। जुलियाना मुरले निर्वाह गरेको भूमिकामा सोनाक्षी देखिनेछिन्।
सोनाक्षी अहिले पञ्जाबमा अक्षय कुमारसँग शिरीष कुन्दरको 'जोकर' फिल्मको सुटिङमा व्यस्त छन्। त्यहाँबाट फर्किएपछि सोनाक्षीले निर्देशक सेल्भासँग भेट्ने योजना छ। सोनाक्षीको यो पहिलो दक्षिण भारतीय फिल्म हुनेछ।
अभिनेत्री माधुरी दीक्षितले चाहिँ दक्षिणका अर्का सुपरस्टार रजनीकान्तसँग फिल्म नखेल्ने भएकी छिन्। स्रोतका अनुसार रजनीले आफ्नो आगामी फिल्म 'राना'मा माधुरीलाई अफर गरेका थिए। तर रजनीको प्रस्तावलाई उनले अस्वीकार गरिन्। फिल्ममा दीपिका पादुकोण र सोनु सुदले खेल्ने पक्का भइसकेको छ। फिल्ममा रजनी तेहेरो भूमिकामा देखिनेछन्।
source:-nagriknews
Kantipur Fm 
0 commentaires